Նախագահ Ջո Բայդենը կիրակի կրկին հորդորել է Կոնգրեսին զենքի վերահսկման օրենքներ ընդունել։ Նախագահի հայտարարությունը հնչել է այն բանից հետո երբ շաբաթ օրը «Թեքսաս սիթի» առևտրի կենտրոնում տեղի ունեցած հրաձգությունը ութ մարդու մահվան պատճառ հանդիսացավ:
Նախագահը կրկին կոչ է արել Կոնգրեսին արգելել հարձակողական զենքերը և դրանց մեծ տարողությամբ պահեստատուփերը, ինչպես նաև համընդհանուր ստուգման ենթարկել զենքի գնորդների կենսագրությունները ու չեղարկել զենք արտադրողներին քրեական հետապնդումից ազատող կարգը:
Քիչ հավանական է, որ Ներկայացուցիչների տունը և Սենատը նման օրենքներ ընդունեն, թեև հարցումները ցույց են տալիս, որ ամերիկացիների մեծամասնությունը կողմ է զենք գնել ցանկացողների կենսագրությունների ստուգման կարգի ներդրմանը:
«Մեզ անհրաժեշտ են ավելի շատ ու արագ գործողություններ՝ մարդկանց կյանքը փրկելու համար»,- ասել է ԱՄՆ նախագահը՝ հավելելով․ «Թվիթերում տեղ գտնող դատողություններն ու աղոթքները բավարար չեն»:
Բայդենի խոսքերով այս տարի Ամերիկայում արդեն գրանցվել է հրաձգության մոտ 200 դեպք, որոնց հետևանքով մահացել է ավելի քան 14 000 մարդ։ Նախագահն ընդգծել է, որ ամերիկացի երեխաների մահվան հիմնական պատճառը հրազենն է։
Իրավապահները դեռս չեն բացահայտել «Թեքսաս սիթիում» հրաձգություն կատարած կասկածյալի ինքնությունը կամ արարքի շարժառիթները։ Զոհերը նույնպես հայտնի չեն։ Կրակողը սպանվել է ոստիկանության կողմից։
