ԱՄՆ գլխավոր դատախազի պաշտոնում Թրամփի առաջ քաշած թեկնածուն՝ Պամելա Բոնդին Սենատում՝ իրեն այդ պաշտոնին հաստատելու լսումների ժամանակ, ընդգծեց, որ անաչառ է լինելու իր գործունեության ընթացքում:
«Կուսակցականությունը, առավելություն ստանալու գործելակերպը կկորչեն։ Ամերիկայում բոլորի համար կլինի միատեսակ արդարադատություն»,- ասել է Պամելա Բոնդին:
Բոնդիի կարիերան բազմազան է՝ եղել նահանգի գլխավոր դատախազ, լոբբիստ և Թրամփի երկարամյա խորհրդական:
«Երկրի երրորդ ամենամեծ նահանգի գլխավոր դատախազի պաշտոնում ութ տարի ծառայելը հիանալի նախապատրաստություն է ԱՄՆ գլխավոր դատախազի դերի համար»,- ասել է հանրապետական սենատոր Չաք Գրասլին:
Դեմոկրատ սենատորները, սակայն, մտահոգ էին՝ Բոնդին կարող է քաղաքական հետապնդումներ սկսել:
«Նորընտիր նախագահ Թրամփը երդվել է ոչ միայն օգտագործել Արդարադատության նախարարությունը իր քաղաքական շահերն առաջ տանելու համար, այլև, մեջբերում եմ, հատուցել ներքին թշնամուն: Բայց ես պետք է գիտենամ, որ դուք «ոչ» կասեք նախագահին, եթե ձեզ խնդրեն անել մի բան, որը սխալ է, անօրինական կամ հակասահմանադրական»,- ասել է դեմոկրատ սենատոր Դիք Դըրբինը:
Բոնդին չբացառեց Թրամփի հակառակորդների նկատմամբ հետաքննություն սկսելը, սակայն վստահեցրեց սենատորներին, որ նա կմնա արդար:
«Իրավաբանական ընկերությունում չէի աշխատի, դատախազ չէի լինի. [նահագնի] գլխավոր դատախազ չէի լինի, եթե որևէ մեկը խնդրեր ինձ անպատշաճ բան անել, և ես հասկանայի, որ պետք է այդ անեմ»,- արձագանքել է Բոնդին։
Դիտորդներից մեկի խոսքով, իրականում, Պամելա Բոնդին կարող է դժվարին կացության մեջ հայտնվել գլխավոր դատախազի պաշտոնում:
«Արդարադատության նախարարությունը պատմականորեն պաշտպանել է Սպիտակ տնից որոշակի անկախություն ունենալու գաղափարը: Այժմ Դոնալդ Թրամփը չի գնահատում այդ անկախությունը։ Այդ մասին տեղյակ ենք այն հարաբերություններից, որոնք նա ցանկանում էր ունենալ Բիլ Բարրի և [Թրամփի օրոք աշխատած] մյուս գլխավոր դատախազների հետ, և այն հիասթափությունից, որ նա ունեցավ, երբ իր գլխավոր դատախազները չաջակցեցին իրեն»,- «Ամերիկայի ձայնին» ասել է Փենսիլվանիայի համալսարանի ներկայացուցիչ Քլեր Ֆինքելսթեյնը:
Այստեղ նշենք, որ ԱՄՆ-ում գլխավոր դատախազը ղեկավարում է Արդարադատության նախարարությունը։
Բոնդիին առնչվող լսումների ժամանակ այս հինգշաբթի հրավիրյալները վկայություն էին տալիս նրա խառնվածքի մասին։ Խոսեց նաև Ֆլորիդայի Սենատի նախկին անդամ, դեմոկրատ Դեյվ Էրընբերգը։
«Դատախազի գործն է՝ առանց վախի և կողմնապահության հետևել ապացույցներին և օրենքին: Փեմ Բոնդին 20-ամյա դատախազ է, և հասկանում է սա, եթե անգամ գործում է որպես Միացյալ Նահանգների գլխավոր դատախազ: Կարծում եմ՝ նա միշտ կհետևի օրենքին, ու կան մի քանի կարևոր հարցեր, որոնցում ես և նա լիովին համաձայն ենք, օրինակ՝ մահացու ֆենտանիլի հոսքը դադարեցնելու անհրաժեշտությունը, որը դարձել է մարդկանց կյանքը ամենից շատ խլող միջոցը՝ շարունակվող օփիոիդային համաճարակի ընթացքում»,- ասել է Էրընբերգը:
Այլ հրավիրյալներ վկայել են, թե նախկինում Բոնդիի գործունեությունը՝ որպես կորպորատիվ լոբբիստ, կարող է շահերի բախում առաջացնել:
«Նրա հաճախորդների ցուցակը լի է հակասական հաճախորդներով, որոնցից ոմանք կարող են ուղղակիորեն օգուտ քաղել, որ իրենց նախկին լոբբիստը ղեկավարելու է Արդարադատության նախարարությունը: Նախորդ հինգ տարիներին նա ներկայացրել է խոշոր կորպորացիաների և օտարերկրյա կառավարությունների կապալառուներ հանդիսացող 30 ներկայացուցիչերի շահերը: Բացի այդ, Ֆլորիդայի գլխավոր դատախազի պաշտոնում՝ ավելի վաղ․․․, ըստ The New York Times-ի, ի հայտ են եկել որոշ ապացույցներ, որոնք ցույց են տալիս նրա ընդհանուր հակվածությունը օգնել կորպորատիվ դաշնակիցներին և կորպորատիվ լոբբիստներին»,- ասել է Public Citizen կազմակերպության համանախագահ Լիզա Գիլբերթը:
Եթե Պամելա Բոնդին հաստատվի ԱՄՆ գլխավոր դատախազի պաշտոնում, ապա պատմության մեջ կմնա որպես Միացյալ Նահանգների երրորդ կին գլխավոր դատախազը:
