Երկուշաբթի Եվրամիության անդամ-երկրների արտգործնախարարները հավանություն են տվել դիվանագիտական անձնագրեր ունեցող վրացի պաշտոնյաների համար առանց վիզայի ռեժիմի դադարեցման որոշմանը՝ Reuters-ին հայտնել են դիվանագիտական երկու աղբյուրներ:
Քայլն արվում է ի պատասխան Վրաստանում իշխանությունների կողմից բողոքի ցույցերի դաժան ճնշմանը:
ԵՄ անդամ-երկրների արտգործնախարարները դեռ դեկտեմբերին կոչ էին արել Եվրահանձնաժողովին այս հարցի վերաբերյալ առաջարկությամբ հանդես գալ։ Երկուշաբթի ընդունված որոշումը նպատակ ունի ճնշում գործադրել Վրաստանի իշխանական քաղաքական գործիչների նկատմամբ՝ չվնասելով երկրի շարքային քաղաքացիներին, որոնք իրենց անձնագրերով կշարունակեն մուտք գործել Եվրամիություն։
Արևմուտքի հետ պաշտոնական Թբիլիսիի հարաբերությունները հատկապես սրվեցին, երբ անցած տարվա հոկտեմբերին Վրաստանի Կենտրոնական ընտրական հանձնաժողովը հայտարարեց, թե իշխող կուսակցությունը՝ «Վրացական երազանքը», հաղթանակ է տարել խորհրդարանական ընտրություններում։
Վրացական ընդդիմությունն ընդգծում է՝ ընտրությունները կեղծվել են։
Անցած տարվա նոյեմբերին Վրաստանի կառավարության հայտարարեց Եվրամիությանը Վրաստանի անդամակցության շուրջ բանակցությունները մինչև 2028 թվականը դադարեցնելու մասին, ինչը բողոքի զանգվածային ցույցեր առաջացրեց երկրում։ Իշխանությունները պատասխանեցին բռնաճնշումներով։
