Նախկին կոնգրեսական Թուլսի Գաբարդը հինգշաբթի Սենատի Հետախուզության հարցերով հանձնաժողովի անդամներին ասել է, որ, եթե հաստատվի Ազգային հետախուզության տնօրենի պաշտոնում, «թարմ աչքեր» կբերի և կվերականգնի հավատը հետախուզական համայնքի 18 գործակալությունների նկատմամբ, որը, ըստ նրա, «բոլոր ժամանակների նվազագույն կետում է»։
«Չափազանց երկար ժամանակ թերի, անհամարժեք հետախուզական [տեղեկատվությունը] հանգեցրել է թանկարժեք ձախողումների, խարխլել մեր ազգային անվտանգությունը և Աստծո կողմից տրված ազատությունները»,- ասել է Գաբարդը իր թեկնածության հաստատման լսումների ժամանակ։
«Սրան պետք է վերջ տրվի։ Նախագահ Թրամփի վերընտրվելը հստակ մանդատ է ամերիկյան ժողովրդի կողմից՝ կոտրել ձախողումների այդ շղթան, ինչպես նաև վերացնել հետախուզական համայնքի քաղաքականացված լինելը»,- նշել է նա։
Գաբարդը նաև քննադատել է իր թեկնածության դեմ արտահայտվողներին՝ պնդելով, որ ինքը «հավատարիմ է ոչ թե ինչ-որ մեկին կամ որևէ կառույցի, այլ Աստծուն, իմ խղճին և Միացյալ Նահանգների Սահմանադրությանը»։
«Իմ քաղաքական հակառակորդներին իսկապես անհանգստացնում է այն, որ ես հրաժարվում եմ լինել նրանց խամաճիկը»,- ասել է նա իր բացման խոսքում։
Անցած տարվա նոյեմբերի նախագահական ընտրություններում Թրամփի հաղթանակից անմիջապես հետո նրա որոշումը՝ առաջադրել Գաբարդին այդ պաշտոնում, անակնկալի բերեց որոշ օրենսդիրների և հետախուզության նախկին պաշտոնյաների։
Հավայան նահանգից ընտրված ԱՄՆ Ներկայացուցիչների տան նախկին դեմոկրատ անդամ և ԱՄՆ նախագահի 2020 թվականի ընտրություններում Դեմոկրատական կուսակցության թեկնածու Թուլսի Գաբարդը ավելի քան 20 տարի ծառայել է ԱՄՆ բանակի ազգային գվարդիայում և մասնակցել Իրաքում ու Քուվեյթում ամերիկյան բանակի առաքելություններին։ Չնայած ռազմական բժշկության ոլորտում լավ ծառայության համար կրծքանշան է ստացել, նա բարձր ղեկավար պաշտոններ չի զբաղեցրել։
Գաբարդին քննադատել են թե՛ հանրապետականները, թե՛ դեմոկրատները՝ Ուկրաինա Ռուսաստանի լայնամասշտաբ ներխուժման, քաղաքացիներին ապօրինի հետևելու, ինչպես նաև ԱՄՆ Ազգային անվտանգության գործակալության նախկին աշխատակից Էդվարդ Սնոուդենին ներում շնորհելու մասին օրենսդրության վերաբերյալ արված հայտարարությունների համար։
Սնոուդենը, ինչպես հայտնի է, մեղադրվում է հազարավոր գաղտնի փաստաթղթերի արտահոսքի մեջ՝ նախքան Ռուսաստան փախչելը։
Քննադատության առարկա է դարձել նաև Գաբարդի 2017 թվականի Սիրիա կատարած այցը, որի ժամանակ նա հանդիպել է երկրի այն ժամանակվա նախագահ Բաշար ալ-Ասադի հետ։
«Արդար է ասել, որ տիկին Գաբարդի առաջադրումը մի փոքր ավելի մեծ հետաքրքրություն և ուշադրություն է առաջացրել, քան այս հանձնաժողովի առջև հանդես եկած մյուս թեկնածուներինը»,- լսումների մեկնարկին ասել է հանձնաժողովի հանրապետական նախագահ Թոմ Քոթոնը։
Սակայն Քոթոնը, ով ավելի վաղ Fox News-ին փոխանցել էր, որ Գաբարդը պատրաստ է ստանձնել ԱՄՆ հետախուզության ղեկավարի դերը, նաև նշել է, որ իրեն անհանգստացրել են կասկածները, որոնք հնչել են Գաբարդի հայրենասիրության և պետական գործին հավատարմության վերաբերյալ։
«Կարող եմ միայն ծիծաղել որոշ քննադատների վրա, ովքեր ասում են, որ տիկին Գաբարդը ոչ ավանդական հայացքներ ունի»,- ասել է Քոթոնը։
Մյուս սենատորները, սակայն, նույն կարծիքին չէին։
«Շարունակում եմ մտահոգված լինել ձեր դատողությունների և ձեր որակավորումների հետ կապված։ Դուք բազմիցս արդարացրել եք մեր հակառակորդների ամենավատ գործողությունները և փոխարենը հաճախ մեղադրել եք Միացյալ Նահանգներին։ Ուստի չեմ կարծում, որ սա ձեզ համար համապատասխան պաշտոն է»,- հայտարարել է հանձնաժողովի փոխնախագահ, դեմոկրատ Մարկ Ուորները։
Սենատի հետախուզության հարցերով հանձնաժողովի անդամները բազմաթիվ հարցեր ուղղեցին Գաբարդին Սնոուդենի վերաբերյալ նրա հայտարարությունների մասին՝ չնայած նա հավաստիացրեց, որ եթե հաստատվի Էդվարդ Սնոուդենի մեղավորությունը, չի ձգտի հասնել նրան ներում շնորհելուն։
«Իմ հավատարմությունը մեր Սահմանադրությանը և երկրի անվտանգությանը վեր է ամեն ինչից»,- հայտարարել է Թուլսի Գաբարդը։
Դեմոկրատ սենատոր Մայքլ Բենեթը հիասթափություն է հայտնել Գաբարդի պատասխաններից։
«Սա այն պահն է, երբ դուք պետք է պատասխանեք այն մարդկանց հարցերին, որոնց ձայները դուք պահանջում եք՝ հաստատվելու համար որպես այս երկրի հետախուզության գլխավոր պաշտոնյա։ Չե՞նք կարող ավելի լավ գործել»,- ասել է Բենեթը։
Դիրքորոշումը ուկրաինական պատերազմի հարցում
Հարցերի մի զգալի մասը վերաբերել է Ուկրաինա Ռուսաստանի լայնածավալ ներխուժման վերաբերյալ Գաբարդի նախկին հայտարարություններին։
«Այս պատերազմն ու տառապանքը կարելի էր հեշտությամբ կանխել, եթե Բայդենի վարչակազմը, ՆԱՏՕ-ն պարզապես ընդունեին Ռուսաստանի օրինական մտահոգությունները անվտանգության հետ կապված»,- գրել էր Գաբարդը սոցիալական ցանցերում, երբ Ռուսաստանը 2022 թվականին ներխուժեց Ուկրաինա։
Սակայն հինգշաբթի լսումների ժամանակ նա այլ դիրքորոշում հայտնեց։
«Պուտինն է սկսել պատերազմն Ուկրաինայում»,- հայտարարել է Թուլսի Գաբարդը՝ ընդգծելով. «Իմ միակ ուշադրությունը, հանձնառությունը և պատասխանատվությունը վերաբերում է մեր երկրին, մեր անվտանգությանը և ամերիկյան ժողովրդի շահերին»։
Գաբարդը Ռուսաստանին բնութագրել է որպես «ռազմավարական մրցակից»՝ միջուկային զենքի մտահոգիչ զինանոցով։
Հանդիպումը Սիրիայի նախկին նախագահ ալ-Ասադի հետ
Գաբարդը պաշտպանել է 2017 թվականին Սիրիա կատարած իր այցը և իր հանդիպումը ալ-Ասադի հետ, որին ԱՄՆ-ն ու բազմաթիվ այլ երկրներ մեղադրում էին սիրիացի խաղաղ բնակչության դեմ քիմիական զենք օգտագործելու մեջ։
«Ես նրան կոշտ հարցեր տվեցի իր վարչակարգի գործողությունների, քիմիական զենքի կիրառման և սեփական ժողովրդի դեմ իրականացվող դաժանությունների վերաբերյալ»,- ասել է Թուլսի Գաբարդը։
Ազգային հետախուզության տնօրենի թեկնածուն իր մտահոգությունն է հայտնել Չինաստանի հետ կապված հաքերային հարձակումների վերաբերյալ, մասնավորապես Volt Typhoon և Salt Typhoon խմբերի գործողությունների մասին։
«Իշխանությանը ճշմարտությունն ասելու մեծ փորձ ունեմ։ Կանեմ ամեն ինչ, որպեսզի գտնեմ ճշմարտությունը, անկախ նրանից, թե ուր է այն տանում, և այդ ճշմարտությունը կկիսեմ նախագահ Թրամփի, նրա խորհրդականների և Կոնգրեսի հետ»,– հայտարարել է Թուլսի Գաբարդը։
