ԱՄՆ նախագահ Դոնալդ Թրամը հեռախոսազրույց է ունեցել ՌԴ նախագահ Վլադիմիր Պուտինի և Ուկրաինայի նախագահ Վոլոդիմիր Զելենսկիի հետ՝ կողմերին կոչ անելով գնալ խաղաղ բանակցությունների։
Մինչ խաղաղ բանակցությունների հասնելը, Արևելյան Ուկրաինայում գտնվող Պոկրովսկ քաղաքը ավերակների է վերածվել՝ ռուսական հարձակումների և հրետակոծությունների հետևանքով։ Ուկրաինական իշխանությունները կարգադրել էին քաղաքացիական անձանց լքել քաղաքը դեռ 2024 թվականի ամռանը, ու թեև շատերը հեռացել են, սակայն մոտ 7 հազար մարդ դեռ Պոկրովսկում է, չնայած այն չունի գազ, էլեկտրականություն և հոսող ջուր:
«Ձեզ ասացի՝ նրան սեփական բնակարան է պետք»,- տեղացիներից մեկը դիմում է զինվորականին։
«Ինչո՞ւ եք դեռ այստեղ: Իսկ եթե հրետակոծե՞ն: Երբ իրավիճակը հանդարտվի, կարող եք վերադառնալ»,-արձագանքել է զինվորականը։
«Մենք լավ ենք, տղաներ, մի անհանգստացեք»,- ասում է մեկ այլ բնակիչ:
Զինվորականները փորձում են համոզել բնակիչներին հեռանալ։ Այս զույգը համաձայնել է հեռանալ միայն երեխաների հետ խոսելուց հետո։
Բայց մյուսները չեն շտապում հեռանալ. «Մենք այստեղ ենք մնում, մեր կատուն այստեղ է»:
«Չենք ուզում, որ դուք այստեղ մեռնեք, հասկանու՞մ եք: Մենք եկել ենք այստեղ ձեզ համար»,- միջամտում է զինվորականը:
Կինը պնդում է՝ «Խնդրում եմ, խնդրում եմ, մենք չենք ցանկանում տարհանվել»:
Եվգեն Տուզովը կամավոր է, օգնում է մարդկանց տարհանել վտանգավոր տարածքներից: Ասում է, որ ամենից հաճախ մեծահասակներն են հրաժարվում հեռանալ. «Հիմնական պատճառն այն է, որ մարդիկ չեն կարծում, որ կարող են գոյատևել որևէ այլ տեղ իրենց ունեցածով: Օրինակ՝ թոշակառուն։ Ոչ երեխաներ ունի, ոչ մի բան, ամսական 85 դոլար թոշակ է ստանում՝ միջին մի թոշակ Ուկրաինայի համար: Նա հասնում է Դնեպր, Պոլտավա, Իվանո-Ֆրանկիվսկ…։ Ի՞նչ անի նա այդ փոքր գումարով»:
Տուզովն ասում է, որ Պոկրովսկից տարհանումը բավականին վտանգավոր է, քանի որ ռուսական ուժերը թիրախավորում են ոչ միայն զինվորականներին, այլև քաղաքացիական անձանց տեղափոխող մեքենաներին:
«Օգտագործում են օպտիկամանրաթելային անօդաչու սարքեր, որոնք դեմ ոչինչ չի աշխատում։ Դրանք հզոր են, նույնիսկ զրահամեքենան ապահով չէ դրանց դեմ»,- ասում է նա։
Պոկրովսկը գտնվում է մի քանի մայրուղիների և երկաթգծերի խաչմերուկում: Այնտեղ առկա է նաև քարածխի խոշոր հանք, որից արդյուհանվածը օգտագործվում է երկրի ծանր արդյունաբերության մեջ: Հանքավայրի շահագործումը դադարեցվել էր անցած ամիս։
Վաշինգտոնում գործող Ժողովրդավարությունների պաշտպանության հիմնադրամի ներկայացուցիչ Ջոն Հարդին ասում է, որ ռուսական ուժերը ցանկանում են վերահսկել Պոկրովսկը երկու պատճառով՝ քարոզչական և պրակտիկ։
«Կարծում եմ, որ ռուսները [Պոկրովսկի գրավումը] կներկայացնեն հիմնականում որպես խորհրդանշական հաղթանակ, բայց նաև հետագա առաջխաղացման համար ցատկահարթակ, որպեսզի կարողանան տարբեր ուղղություններով առաջ գնալ»,- ասում է նա։
Ինչևէ, ուկրաինացի ոստիկաններն ու կամավորները շարունակում են Պոկրովսկում տարհանման աշխատանքները։ Ռուսական ուժերը մոտենում են քաղաքին:
