Հինգշաբթի «Համասի» կողմից վերադարձված չորս դիերը 83-ամյա Օդեդ Լիֆշիցինն են ու Բիբաս ընտանիքի երկու փոքր երեխաներինը: Չորրորդը՝ դեռ անհայտ մի կնոջ մարմնի մնացորդներ են։
Այս տեղեկությունը փոխանցել են Իսրայելի պաշտպանության նախարարությունից՝ մեղադրելով պաղեստինյան խմբավորմանը հրադադարի պայմանները խախտելու մեջ: «Համասը» դեռ չի արձագանքել։
Միչդեռ, տասնյակ իսրայելցի պատանդներ տակավին Գազայում են, այդ թվում՝ Գայ Գիլբոա-Դալալը:
«Ամերիկայի ձայնի» հետ զրույցում նրա եղբայրն ասում է. «Ամենն, ինչ անում ենք, եղբորս համար է: Նրան հետ ենք բերելու համար է: Մեզ հետաքրքրում է միայն նրան նորից տեսնելը»։
Հրադադարի առաջին փուլի շրջանակներում ազատ են արձակվել 33 պատանդներ: Նրանց վերադարձը մեծացրել է ճնշումը Իսրայելի վարչապետ Բենիամին Նեթանյահուի նկատմամբ, որպեսի բանակցություններ սկսի հրադադարի համաձայնագրի երկրորդ փուլի մեկնարկի համար:
Սակայն իսրայելական կառավարության կոալիցիայի ծայրահեղ աջ անդամների հայտարարած նպատակն է «Համասի» ոչնչացումը:
Իսրայելական ու պաղեստինյան կողմերի նկատմամբ ճնշումները չեն դադարում նաև Վաշինգտոնից. ԱՄՆ պետքարտուղար Մարկո Ռուբիոն այս շաբաթ Իսրայելում էր՝ ձգտելով հասնել հրադադարի երկրորդ փուլի մեկնարկին, ինչը, ըստ դիտորդների, դյուրին գործ չէ։
Ջորջ Մեյսոն համալսարանի Միջազգային անվտանգության ծրագրի ղեկավար Էլեն Լեյփսոնն ասում է. «Հնարավոր է, որ նրանք համաձայնեն ուղղակի երկարաձգել առաջին փուլը: Բայց երկու կողմերի միջև համաձայնություն կայացնել, թե ինչ բովանդակություն է ունենալու երկրորդ փուլը, կարծում եմ, բավականին բարդ է»:
Այս ամենի ֆոնին՝ առանձնանում է ԱՄՆ նախագահ Դոնալդ Թրամփի հայտարարությունը, թե նպատակ ունի Միացյալ Նահանգների վերահսկողությունը հաստատել Գազայի հատվածի նկատմամբ՝ վերակառուցելով այն:
ԱՄՆ նախագահի ազգային անվտանգության հարցերով խորհրդական Մայք Ուոլցը հինգշաբթի հայտարարեց, թե Գազայի հատվածը «դժոխքի է վերածվել». «Չպայթած արկեր, ամենուր բեկորներ, առանց կոյուղու, առանց ջրի, և նախագահ Թրամփն առաջ է քաշել մի ծրագիր՝ գործ ունենալ իրականության հետ, ուր այժմ տառապում են Գազայի 1,8 միլիոն բնակիչները»:
Հայտնի է, որ արաբական երկրների ղեկավարները մերժել են Թրամփի ծրագիրը՝ ուրբաթ հանդիպում անցկացնելով Էր-Ռիադում, որը կազմակերպել էր Սաուդյան Արաբիայի թագաժառանգը՝ արքայազն Մուհամմեդ բեն Սալմանը, որի օգնությանն, ի դեպ, ապավինում է Թրամփը՝ Ռուսաստանի հետ բանակցություններ վարելու հարցում:
«Մինչ այժմ միակ բանը, որ տեսել ենք, Եգիպտոսի և որոշ չափով նաև Սաուդյան Արաբիայի կառավարությունների կողմից Գազայի հատվածը վերականգնելուն ուղղված քայլերն են, [որպեսզի] պաղեստինցի ժողովուրդը մնա այնտեղ»,- ասում է Ատլանտյան խորհրդի ավագ գիտաշխատող Ահմեդ Ֆուադ Ալխաթիբը։
Եգիպտոսը հանդես է եկել առաջարկով՝ երեք տարվա ընթացքում արաբական երկրներից հավաքել մոտ 20 միլիարդ դոլար՝ Գազայի վերականգնման համար:
