Ռուսաստանի նախագահ Վլադիմիր Պուտինը չորեքշաբթի բանակցություններ է վարել Հյուսիսային Կորեայի առաջնորդ Կիմ Չեն Ընի հետ՝ ԱՄՆ-ից ու Հարավային Կորեայից հնչող նախազգուշացումների ֆոնին, թե Փհենյանը մտադիր է սպառազինություն մատակարարել Կրեմլին։ Ներկայացնում է «Ամերիկայի ձայնի» թղթակից Սինդի Սեյնը:
Ռուսաստան ժամանակ Հյուսիսային Կորեայի առաջնորդ Կիմ Չեն Ընը թագավորական ընդունելության արժանացավ՝ այդ թվում՝ նախագահ Պուտինի ուղեկցությամբ շրջելով ռուսաստանյան Հեռավոր Արևելքում գտնվող տիեզերակայանում: Ըստ հաղորդագրության, երկու առաջնորդները քննարկել են հյուսիսկորեացի տիեզերագնացներին տիեզերք ուղարկելու հնարավորությունը, Կիմ Չեն Ընը հետաքրքրվել է հրթիռներով:
Հանդիպումից հետո Պուտինը ռուսաստանյան պետական հեռուստաընկերությանը փոխանցել է, որ Հյուսիսային Կորեայի հետ ռազմական համագործակցության հնարավորություններ են բացվում՝ չնայած միջազգային պատժամիջոցներին։
Your browser doesn’t support HTML5
ԱՄՆ-ն մտահոգված է Ռուսաստանի և Հյուսիսային Կորեայի ռազմական համագործակցությամբ
Իր հերթին՝ Կիմ Չեն Ընը նշել է, որ Փհենյանի համար Ռուսաստանի հետ հարաբերությունները դառնում են առաջնային, և հայտարարել է՝ աջակցում է Ռուսաստանի ներխուժմանը Ուկրաինա։
«Միշտ լիակատար և անվերապահ աջակցություն ենք հայտնել Ռուսաստանի կառավարության և նախագահ Պուտինի ձեռնարկած բոլոր քայլերին»,- ընդգծել է Հյուսիսային Կորեայի առաջնորդը։
Մինչ Պուտինն ու Կիմ Չեն Ընը բարձրաձայնում էին երկկողմ ռազմական համագործակցության մասին, նման հեռանկարը մտահոգություններ է առաջացրել Վաշինգտոնում։
«Որևէ երկիր չպետք է օգնի պարոն Պուտինին՝ սպանել անմեղ ուկրաինացիների: Եթե նրանք որոշեն առաջ շարժվել սպառազինության [մատակարարման] ուղղությամբ, միջոցներ կձեռնարկենք, համապատասխան կերպով կզբաղվենք այդ հարցով»,- հայտարարել է ԱՄՆ Ազգային անվտանգության խորհրդի խոսնակ Ջոն Քիրբին:
Իր մտահգությունը չի թաքցրել նաև ԱՄՆ պետքարտւղարությունը։
«Անհանգստացնող է, երբ տեսնում եք, թե ինչպես են ռուսները Հյուսիսային Կորեայի հետ քննարկում այնպիսի ծրագրեր, որոնց իրականացումը կխախտի ՄԱԿ-ի Անվտանգության խորհրդի բանաձևերը, և որոնց օգտին քվեարկել է հենց Ռուսաստանը»,- ասել է պետքարտուղարության խոսնակ Մեթյու Միլլերը:
Լոնդոնում գործող Ռազմավարական հետազոտությունների միջազգային ինստիտուտի ներկայացուցիչ Մարկ Ֆիցպատրիկն «Ամերիկայի ձայնին» փոխանցել է, որ Հյուսիսային Կորեան և Ռուսաստանը, ըստ երևույթին, գործարք են կնքել, որը շահեկան է նրանց համար, բայց սպառնալիք է միջազգային կարգին ու տարածաշրջանային կայունությանը:
«Ուշագրավ է, որ նրանք հանդիպեցին տիեզերական կենտրոնում: Սա ցույց է տալիս, թե ինչ տեխնոլոգիա է ցանկանում ստանալ Հյուսիսային Կորեան: Հաշվի առնելով, որ [հյուսիսկորեական] նախորդ երկու լրտեսական արբանյակների արձակումները ձախողվեցին՝ Փհենյանը նման աջակցության կարիք ունի»,- նշել է Ֆիցպատրիկը։
Ֆիցպատրիկը կասկածից վեր է համարել, որ Հյուսիսային Կորեան հրետանային արկեր և հակատանկային միջոցներ է մատակարարելու Ռուսաստանին, ինչն, անշուշտ, կօգնի Կրեմլին ուկրաինական մարտադաշտերում, քանի որ ռուսական բանակի զինանոցը սպառվում է:
ՄԱԿ-ի գլխավոր քարտուղար Անտոնիո Գուտերեշը չորեքշաբթի հայտարարել է, որ Հյուսիսային Կորեայի հետ որևէ համագործակցություն պետք է հարգի ՄԱԿ-ի Անվտանգության խորհրդի սահմանած պատժամիջոցների ռեժիմը: