Ներգաղթի վերաբերյալ նախագահ Դոնալդ Թրամփի կոշտ դիրքորոշումը, կարծես բացասական արձագանք է ստանում հատկապես Լատինական Ամերիկայի երկրներում։ Ինչպես հայտնի է, ԱՄՆ իշխանությունները սկսել են ամեն օր հարյուրներով երկրից արտաքսել ապօրինի ներգաղթյակներին, և, օրինակ, Գվատեմալան օրերս ընդունեց իր մի խումբ քաղաքացիների։
Սակայն Կոլումբիայի նախագահ Գուստավո Պետրոն անցած շաբաթ ուղղակի հրաժարվեց նույնն անել՝ արգելելով ԱՄՆ-ից եկող ինքնաթիռին, ուր Միացյալ Նահանգներից արտաքսված կոլումբիացիներ էին, վայրէջք կատարել Կոլումբիայում։
Պետրոյի ու Թրամփի միջև հեռակա բանավեճը շատ արագ թափ հավաքեց, և երկու կողմերն էլ անցան սպառնալիքների, թե բարձր մասքսատուրքեր կսահմանեն միմյանց ապրանքների նկատմամբ, սակայն այդ ամենը ընդամենը ժամեր տևեց, քանզի կոլումբիական կողմը հարկադրված զիջեց՝ ԱՄՆ ուղարկելով նախագահական ինքնաթիռը, որպեսզի հայրենիք տեղափոխի ձերբակալված ապօրինի միգրանտներին։
Վաշինգտոնում ընդգծում են՝ նախընտրական արշավի ժամանակ Թրամփը հստակ կերպով ներկայացրել էր իր դիրքորոշումը ապօրինի ներգաղթյալների հարցի վերաբերյալ։
Your browser doesn’t support HTML5
Օրերս ԱՄՆ-ից արտաքսված կոլումբիացիների շուրջ հեռակա բանավեճը Վաշինգտոնի և Բոգոտայի միջև խնդիրներ է առաջացրել
«Նախագահ Թրամփը շատ ուժեղ ուղերձ է հղում աշխարհի մարդկանց. եթե մտածում եք Ամերիկայի Միացյալ Նահանգների օրենքները խախտելու մասին, ձեզ տուն կվերադարձնեն։ Ձեզ կձերբակալեն։ Ձեզ կենթարկեն քրեական պատասխանատվության։ Մի՛ եկեք»,- ասում է Սպիտակ տան մամուլի խոսնակ Քերոլայն Լևիթը։
Կոլումբիայի արտգործնախարարի խոսքով՝ առաջիկա օրերին պատվիրակություն կմեկնի Վաշինգտոն՝ կարգավորելու ծագած հարցերը:
«Մենք կշարունակենք ընդունել կոլումբիացիներին, կոլումբիացի կանանց և տղամարդկանց, ովքեր վերադառնում են որպես արտաքսվածներ՝ նրանց համար երաշխավորելով արժանապատիվ պայմաններ՝ որպես իրավունք ունեցող քաղաքացիների»,- ասել է Կոլումբիայի արտաքին գործերի նախարար Լուիս Գիլբերտո Մուրիլյոն:
Վաշինգտոնում գործող Վիլսոն կենտրոնի վերլուծաբան Էդի Ասևեդոյի կարծիքով՝ Կոլումբիայի հետ բանավեճից Թրամփը հաղթող դուրս եկավ։
«Կարծում եմ՝ շատ պարզ է, որ նախագահ Թրամփն ու Միացյալ Նահանգները հաղթեցին»,- ասում է Ասևեդոն։
Ամեն ինչ տեղի ունեցավ շատ արագ և առանց դիվանագիտական մկիջամտության՝ ասում են դիտորդները։
«[ԱՄՆ ու Կոլումբիայի նախագահների միջև բանավեճը] գիշերվա կեսին հայտնվեց Twitter-ում, և ակնհայտորեն առանց խորհրդակցության դիվանագետների կամ արտգործնախարարությունների հետ։ Այն արագորեն վերածվեց Twitter-յան ճակատամարտի և անհանգստություն առաջ բերեց ու ստեղծեց հանգամանքներ, որոնք չպետք է լինեին»,- ասում է Ամերիկյան ընկերակցության / Ամերիկաների խորհրդի ներկայացուցիչ Էրիկ Ֆարնսվորթը:
Փորձագետների կարծիքով՝ Վաշինգտոնում քննարկվում է Կոլումբիայի հետ հետագա հարաբերությունների հարցը։ ԱՄՆ-ին նաև մտահոգում է, որ նախորդ տարիներին լատինաամերիկյան այդ երկրում նկատելիորեն աճել է կոկայինի արտադրությունը:
«Շատ շուտով նախագահ Թրամփը պետք է որոշում կայացնի Կոլումբիայի հետ անվտանգության գծով և թմրանյութերի դեմ պայքարի շրջանակում համագործակցության վերաբերյալ, և ինձ համար այն կարող է լինել երկու երկրների հարաբերություններին վերաբերող հաջորդ կարմիր դրոշակը»,- ասում է Ասևեդոն:
Մինչդեռ Բոգոտայում լարվածությունը շարունակում է զգացվել։ Երկուշաբթի տասնյակ կոլումբիացիների, ովքեր ԱՄՆ դեսպանատան մոտ սպասում էին ամերիկյան վիզայի ստացմանը, հայտնել են, թե իրենց հետ հանդիպումները չեղարկվել են: