Միացյալ Նահանգների նախագահ Դոնալդ Թրամփը ստորագրել է գործադիր հրաման՝ ստեղծելու ԱՄՆ-ի համար հակաօդային պաշտպանության «Երկաթե գմբեթ» համակարգը, որը լինելու է «ուժի միջոցով խաղաղություն» քաղաքականության կարևոր բաղադրիչ։
«Նախորդ 40 տարիների ընթացքում նոր սերնդի ռազմավարական սպառազինությունից բխող սպառնալիքները ոչ միայն չեն նվազել, այլ դարձել են ավելի ինտենսիվ և բարդ։ Գործընկերներն ու հակառակորդները զարգացնում են նոր սերնդի մատակարարման համակարգեր և ինտեգրված օդային ու հակահրթիռային պաշտպանության հնարավորություններ՝ պաշտպանելու իրենց տարածքները»,- նշված է Սպիտակ տան հայտարարությունում։
Փաստաթղթում ասվում է, որ «ուժի դիրքից խաղաղության» հասնելու նպատակով ԱՄՆ քաղաքականությունը պետք է ապահովի իր քաղաքացիների և երկրի պաշտպանությունը՝ հաջորդ սերնդի հակահրթիռային պաշտպանության վահանի տեղակայմամբ։
Նախագահ Թրամփի հայտարարության համաձայն՝ համակարգը պետք է զսպի հնարավոր ագրեսորներին և պաշտպանի ԱՄՆ քաղաքացիներին ու կարևոր ենթակառուցվածքները օտարերկրյա օդային հարձակումներից՝ միաժամանակ ապահովելով հուսալի պատասխան հարվածի հնարավորություն։
Սպիտակ տան ղեկավարը հանձնարարել է Պենտագոնի ղեկավարին 60 օրվա ընթացքում ներկայացնել ծրագիր՝ հաջորդ սերնդի հակահրթիռային պաշտպանության վահանի ստեղծման վերաբերյալ։
ԱՄՆ պաշտպանության նախարար Փիթ Հեգսեթը՝ պաշտոնամուտից հետո առաջին անգամ Պենտագոն այցելելիս։ Հունվարի 27, 2025թ․։
Ծրագիրը պետք է ներառի Միացյալ Նահանգների պաշտպանությունը բալիստիկ, հիպերձայնային և թևավոր հրթիռներից, ինչպես նաև նոր սերնդի օդային հարձակում իրականացնող այլ զինատեսակներից։ Բացի այդ, նախատեսվում է մշակել և տեղակայել հրթիռային հարձակումները կանխող, հակառակորդի հրթիռային կայաններին կանխարգելիչ հարվածներ հասցնող համակարգեր։
Սպիտակ տան հայտարարության համաձայն՝ անհրաժեշտ է ներդնել բոլոր անհրաժեշտ բաղադրիչների ապահով մատակարարման շղթա՝ նոր համակարգի ստեղծման համար։