Նորություն չէ, որ պաշտոնամուտից ի վեր ԱՄՆ նախագահ Դոնալդ Թրամփը չի թուլացնում ճնշումը Վաշինգտոնին դաշնակից ու գործընկեր պետությունների նկատմամբ, որոնք, իր կարծիքով, շահագործում են Միացյալ Նահանգները:
«Նրանք գալիս են և գողանում են մեր հարստությունը, գողանում են մեր աշխատատեղերը, գողանում են մեր ընկերությունները»,- ասել է Թրամփը:
Վաշինգտոնի կողմից կիրառվող ճնշումը տարատեսակ է՝ Թրամփը սպառնում է մաքսատուրքերով, խոսում է Գրենլանդիան վերցնելու և Կանադան ԱՄՆ 51-րդ նահանգ դարձնելու մասին:
Քանդա համալսարանի պրոֆեսոր Ջեֆրի Հոլի խոսքով՝ ահա, այս համատեքստում է Ճապոնիայի վարչապետ Շիգերու Իշիբան հանդիպելու Թրամփին, և նման իրավիճակը մտահոգում է շատերին Տոկիոյում:
Your browser doesn’t support HTML5
Հանդիպումը տեղի կունենա այն ժամանակ, երբ Թրամփը ուժեղացնում է ճնշումը ԱՄՆ դաշնակիցների և գործընկերների նկատմամբ
«Եթե դիտում եք ճապոնական լրատվամիջոցները կամ լսում եք, թե ինչ են ասում ճապոնացիները, նրանք հույս են հայտնում, թե Իշիբան կկարողանա դուրս գալ այդ հանդիպումից՝ առանց Ամերիկայի նոր հարձակման զոհ դառնալու»,- ասում է Հոլը:
Շատերն են հիշում, որ Թրամփի առաջին նախագահության օրոք ԱՄՆ-ի ու Ճապոնիայի միջև առաջացած լարվածությունը մեղմվեց՝ մասամբ նախկին վարչապետ Սինձո Աբեի անձնական դիվանագիտության շնորհիվ:
Բայց նույնը կրկնել դժվար կլինի Իշիբայի համար, որն այլ խառնվածքի տեր մարդ է:
«Նա մի տեսակ ակադեմիական մարդ է: Սիրում է բացատրել տանջալից մանրամասնություններով, ինչը կարող է լավ լինել խորհրդարանական բանավեճի կամ այլ միջավայրում, բայց դա Թրամփի նախընտրած զրույցի ճիշտ հակառակն է»,- հավելում է պրոֆեսորը:
Ճապոնիայում ոմանք հարցնում են, թե ինչու է Իշիբան այժմ որոշել հանդիպել Թրամփին, հնարավոր չէ՞ առժամանակ հեռու մնալ Վաշինգտոնից:
Մյուսների կարծիքով՝ ավելի լավ է լինել նախաձեռնող, որը կարող է օգնել խուսափել ապագա լարվածությունից:
«Ոմանք ասում են «մի արթնացրու քնած երեխային», բայց պետք է ռիսկի դիմել, եթե ուզում եք ավելի լավ հարաբերություններ ունենալ»,- ասում է Վասեդայի համալսարանի պրոֆեսոր Միեկո Նաքաբայաշին:
Ինչևէ, դիտորդների խոսքով, գործ ունենք, ըստ էության, նույն տրամաբանության հետ, որով ԱՄՆ-ն առաջ է շարժվում գրեթե յուրաքանչյուր դաշնակցի պարագայում՝ Թրամփի հայտարարած «Նախևառաջ Ամերիկան» մոտեցման ներքո: