CNN-ի State of the Union հեռուստահաղորդմանը հյուրընկալվելիս Թոմ Հոմանը նշել է, որ հունվարի 20-ին Թրամփի երդմնակալության արարողությունից հետո 14,000 միգրանտ է ձերբակալվել, սակայն հավելել է, որ «պետք է շատ ավելին անել»:
Ձերբակալվածներից շատերը կա՛մ արտաքսվել են հայրենի երկրները, կա՛մ ուղարկվել են Կուբայում՝ Գուանտանամո ծովածոցում գտնվող ԱՄՆ ռազմածովային բազայի բանտ: Ոմանք ազատ են արձակվել՝ թույլտվություն ստանալով ապրել Միացյալ Նահանգներում մինչև դատական գործընթացները:
Ըստ գնահատականի՝ ԱՄՆ-ում ապրում են մոտ 11 միլիոն ապօրինի միգրանտներ:
Թրամփն իր նախընտրական արշավի ժամանակ խոստացել էր գտնել և արտաքսել «միլիոնավոր» միգրանտների: Պաշտոնյաներն ասում են, որ առաջին ձերբակալություններն ուղղված էին այն միգրանտների դեմ, որոնք ԱՄՆ-ում
դատապարտված են եղել հանցագործությունների համար, սակայն այժմ ցանկացած անձ, որը երկրում ապրում է առանց համապատասխան փաստաթղթերի, կարող է թիրախ դառնալ:
Ըստ Հոմանի, արտաքսվածների թիվը «շատ ավելի մեծ է», քան նախկին նախագահ Ջո Բայդենի օրոք էր: Նա նշել է, որ «պետք է բարձրացնել ցուցանիշները, ծանր աշխատանք է»։
Թրամփի վարչակազմի առաջին օրերին օրական հարյուրավոր միգրանտների էին ձերբակալում: Այժմ այդ թիվը ցածր է:
ԱՄՆ Ներքին անվտանգության նախարարությունը հունվարի վերջին հաղորդեց օրական միջինը մոտ 800 ձերբակալությունների մասին: Հունվարի 26-ին եղել է 1,179 ձերբակալություն: Փետրվարի առաջին երկու շաբաթվա ընթացքում այդ թիվն օրական 600-ից քիչ էր:
Թրամփի վարչակազմի նպատակն է օրական ձերբակալել 1,200-ից 1,500 ապօրինի միգրանտի: