Ուկրաինայի տարածքային ամբողջականությունն ու ինքնիշխանությունը անվիճելի են, և Թուրքիան կարող է լինել այն վայրը, ուր Կիևն ու Մոսկվան հնարավորություն կունենան վարել իրենց բանակցությունները՝ երեքշաբթի հայտարարել է Թուրքիայի նախագահ Ռեջեփ Թայիփ Էրդողանը։
Ուկրաինայի նախագահ Վոլոդիմիր Զելենսկու հետ բանակցություններից հետո Անկարայում կայացած ասուլիսում Էրդողանը, մասնավորապես, ասել է, թե ԱՄՆ նախագահ Դոնալդ Թրամփի՝ Ուկրաինայի և Ռուսաստանի միջև պատերազմին վերջ տալու դիվանագիտական նախաձեռնությունը համահունչ է Թուրքիայի քաղաքականությանը՝ Ուկրաինա Ռուսաստանի լայնամասշտաբ ներխուժման սկզբից ի վեր։
Իր հերթին՝ Ուկրաինայի նախագահ Վոլոդիմիր Զելենսկին երեքշաբթի հայտարարել է, թե մինչև մարտի 10-ը հետաձգել է իր այցը Սաուդյան Արաբիա, որը նախատեսված էր այս չորեքշաբթի, և որ Ուկրաինայի թիկունքում չեն կարող իրականացվել պատերազմը դադարեցնելու շուրջ բանակցություններ։
Զելենսկու խոսքով՝ արդար խաղաղություն ապահովելու համար ԱՄՆ-ն, Ուկրաինան և Եվրոպան պետք է մասնակցեն Կիևի համար նախատեսված անվտանգության երաշխիքների շուրջ բանակցություններին։
Reuters-ի փոխանցմամբ՝ Ուկրաինայի հարցով ԱՄՆ նախագահի հատուկ բանագնաց Քիթ Քելլոգը երեքշաբթի երեկոյան մեկնել է Կիև։