Չիկագոյի, Դենվերի, Նյու Յորքի և Բոստոնի քաղաքապետերը չորեքշաբթի` Կենտուկիից ընտրված կոնգրեսական Ջեյմս Քոմերի գլխավորած լսումների ժամանակ անդրադարձել են «ապաստան տրամադրող քաղաքների» քաղաքականությանը` ապօրինի ներգաղթյալների վերաբերյալ պայքարի համատեքստում։
«Դաշնային օրենքը պահանջում է այդ անօրինական [ներգաղթյալներին], հանցագործներին հանձնել ԱՄՆ Ներգաղթի և մաքսային ծառայությանը։ Մենք լսել ենք զեկույցներ, և ձեզնից շատերը հրապարակայնորեն ասել են, որ պատրաստվում էին խոչընդոտել դրան: Դա հակասում է օրենքին, և մենք այսօր այդ մասին ավելին ենք լսելու»,- նշել է ԱՄՆ Ներկայացուցիչների տան հանրապետական անդամ Ջեյմս Քոմերը:
Չիկագոյի դեմոկրատ քաղաքապետ Բրենդոն Ջոնսոնը պաշտպանել է նշված քաղաքականությունը:
«Չիկագոյի «Հյուրընկալ քաղաք կանոնադրությունը» և մեր մյուս օրենքներն ու քաղաքականությունը չեն նպաստում հանցագործությունների աճին, նրանք չեն խոչընդոտում քրեական գործերով դաշնային իրավապահ մարմինների հետ համագործակցությանը, և հանցագործներին ապաստան չենք տրամադրում, [այլ] ձերբակալում ենք նրանց»,- ասել է Ջոնսոնը:
Չիկագոյի քաղաքային խորհուրդը ընդունել է գործող` «Հյուրընկալ քաղաք կանոնադրությունը» դեմոկրատ քաղաքապետ Ռահմ Էմանուելի օրոք: Օրենքը սահմանափակում է դաշնային` Ներգաղթի և մաքսային ծառայության գործակալների լիազորությունները, օրինակ՝ հարցաքննել կալանավորվածներին, օգտագործել քաղաքային հաստատությունները` հետաքննության համար:
2017 թվականին նմանատիպ ակտ ընդունվեց Իլինոյս նահանգի մակարդակով` երկկուսակցական աջակցությամբ:
«Ապաստան [տրամադրող] քաղաքները ապաստարաններ են հանցագործների համար»,- հայտարարել է ԱՄՆ Ներգաղթի և մաքսային ծառայության ղեկավար Թոմ Հոմանը:
ԱՄՆ-ում Թոմ Հոմանին կոչում են «սահմանային ցար», որը, փաստորեն, համակարգում է դաշնային կառավարության ջանքերն ապօրինի ներգաղթի դեմ:
«Ցանկանում եմ, որ տեղական ոստիկանությունը անի այն, ինչ կարող է, որպեսզի օգնի ձերբակալել և վերացնել հանրային անվտանգության սպառնալիքները իրենց համայնքներում»,- նշել է Հոմանը:
Փետրվարին ԱՄՆ Արդարադատության նախարարությունը դատական հայց ներկայացրեց Չիկագո քաղաքի և Իլինոյս նահանգի դեմ՝ վերջիններիս ապաստան տրամադրող քաղաքականության համար:
Հոմանի համոզմամբ` նման ջանքերը ողջունելի են՝ արգելափակելու այն օրենքներն ու կարգադրությունները, որոնք դժվարացնում են դաշնային իրավապահների պայքարն ապօրինի ներգաղթյալների դեմ։
«Պատրաստվում ենք պատասխանատվության ենթարկել ապաստան տրամադրող քաղաքներին և դատի տալ նրանց»,- ասել է Հոմանը:
««Ապաստան տրամադրող քաղաք» արտահայտությունն արդեն իսկ ազդանշան է, որ [տեղի] հաստատությունները չեն պատրաստվում ամեն ինչ անել Ներգաղթի և մաքսային ծառայությանը աջակցելու համար Բայց այն նաև չի նշում, թե նրանք պատրաստվում են խոչընդոտել ծառայության աշխատանքը»,- ասել է Հյուսիսարևմտյան համալսարանի ներկայացուցիչ Ժակլին Սթիվենսը:
Սթիվենսը շարունակել է. «Դաշնային օրենքում չկա որևէ դրույթ, որը պարտավորեցնում է ոստիկանությանը, նահանգին կամ շրջաններին իրականացնել Ներգաղթի և մաքսային ծառայության` արտաքսմանը վերաբերող քաղաքականությունը»:
Նա նաև հիշեցրեց` ապաստան տրամադրող քաղաքներին այդ իրավունքից զրկելու նախորդ փորձերը ձախողվել են:
«[ԱՄՆ] Արդարադատության նախարարությունը 2019 թվականին պարտվեց Կալիֆոռնիայի 9-րդ շրջանում: Գերագույն դատարանը հրաժարվեց վերանայել գործը, ուստի այդ գործը տակավին նախադեպային է»,- նշել է Սթիվենսը:
2023 թվականին Չիկագոյի քաղաքային խորհրդի որոշ անդամներ փորձեցին փոփոխություններ կատարել ապաստան տրամադրելու օրենքում, երբ քաղաքի հանրային ծառայություններն այլևս չէին հասցնում սպասարկել ավելացող միգրանտներին, սակայն խորհուրդը դեմ քվեարկեց։